Illudeatnot Ipmila daguin

Ráhkis kristtalaččat. Mii leat čoahkkanan Ohcejoga girkui ipmilbálvalussii. Odne nohká Ohcejoga searvegotte bismmadárkkástus. Mii leat čoahkkanan guldalit Ipmila sáni ja beassat oassálastit eahkedaččaide.

Odne, goalmmát beassášáigge sotnabeaivve, fáddán lea Ipmila álbmoga ruoktoahkit almmi siidii. Sotnabeaivve biibbalsálmmas celkojuvvo: ”Boahttet ja geahččet Ipmila dáguid. Son lea dahkan midjiide stuorra daguid. (Sá. 66:5)

Biibbalsálbma rámida Sivdnideaddji su stuorra daguin. Son oaidná daid su birra ja gohčču earáidge boahtit geahččat daid. Duot dagut leat Ipmila sivdnidandagut, maid sáhttá áicat min birra. Dáppe davvin mii sáhttit áicat ja oaidnit Ipmila daguid erenomažit luonddus, vaikkepa Áilegasduoddariin, Deanuleagis dahje Geavus.

Biibbalsálmma čálli gohčču min geahččat Ipmila daguid, illudit dain ja giitit dain. Ipmil ii vealttakeahttá dárbbaš min giitevašvuođa. Muhto dat, ahte mii giitit Ipmila attáldagain, lea midjiide alccemet dehálaš ášši. Danin biibbalsálmma gohččus ”boahttet ja gehččet Ipmila daguid” lea dárkkuhuvvon maiddái midjiide odne dáppe Ohcejoga girkus.

Dán meassus mii oaččut giitit stuorámus attáldagas, maid Ipmil lea min olbmuid beales dahkan. Oaččut giitit das, ahte Jesus lea ruossa alde soabahan suttuideamet ja lea bajásčuožžilemiinis vuoitán jápmima. Odne mii beassat beastašumi attáldagas oassálažžan Ipmila sáni ja eahkedaččaid bokte. Kristus ii jeara dan, gii lea dohkkalás boahtit eahkedaččaide. Danin oaččut roahkkadit odne boahtit Hearrá bassi eahkedaččaide ja luohttit Kristusa soabahanbargui.

Lean mun maid giitevaš go lean beassan mu bargojoavkkuin oahppásmuvvat golmma beaivve áigge čiekŋalabbot Ohcejoga searvegoddái ja searvegotte olbmuide. Mii leat leamašan Gáregasnjárggas, Njuorggámis ja Ohcejoga girkosiiddas ja mii leat deaivvadan olu olbmuin. Lean buriin mielain dán dárkkástusas, man oktavuođas mii leat smiehtadan Ohcejoga searvegotte boahtteáiggi čuovvovaš logi jahkái.

Jeremiija girjjis (Jer. 29:11) Ipmil cealká profehta hámis: Mun attán didjiide boahtteáiggi ja doaivvu. Dát lea lohpádus maiddái Ohcejoga searvegoddái. Oaččubehtet luohttit dasa, ahte Ipmil ieš lea dinguin dál ja boahttevaš beivviid áigge.